TRABALLOS DE MELLORA E ACONDICIONAMENTO EN VARIAS VÍAS MUNICIPAIS DA PARROQUIA DE ALBA

Os traballos, aos que o Concello de Vilalba destinará un orzamento de 68.000 euros, teñen un prazo de execución dun mes

O Concello de Vilalba xa ten listo o proxecto para acometer varias actuacións de renovación e conservación de diferentes vías de titularidade municipal na parroquia de Alba, que comunican distintos núcleos de poboación entre si e coa estrada N-634. 

Concretamente, os traballos acondicionarán os camiños municipais 065_121, 065_024 e 065_379, que son os viais que comunican entre si e tamén coa N-634 os núcleos de Alba, Abadín, Coea e A Costa.

Estas vías vertebran, xunto cun gran número de tramos municipais, o territorio da parroquia de Alba, dando acceso ás vivendas, explotacións e parcelas distribuídas ao longo de toda a parroquia. 

O continuo uso destas vías, así como as condicións meteorolóxicas e o paso do tempo, provocaron que os noiros das estradas estean saturados de terra vexetal, perdendo a súa forma e uso. Estas eivas provocan que as augas pluviais non se evacúen da plataforma da estrada, xerando danos sobre a capa de rodadura que se incrementan polo desgaste sufrido co paso dos vehículos. 

Dada a situación actual destes tramos, coa intención de reducir o seu deterioro e mellorar a seguridade viaria tanto dos peóns como do tráfico rodado, o Concello de Vilalba decidiu proceder a realizar os traballos pertinentes de acondicionamento e mantemento. 

Para acondicionar o vial e as súas ramificacións, proponse a apertura e limpeza de noiros, unha das tarefas fundamentais xa que é a principal causa de deterioro da vía. Ademais, regularizarase o bacheo con tratamentos de bituminoso semiprofundo e renovarase a súa superficie de rodadura. Por último, procederase á sinalización dos camiños.

Os traballos, aos que o Concello de Vilalba destinará un orzamento de 68.000 euros, teñen un prazo de execución dun mes. 

“O estado de conservación dunha vía é fundamental para a seguridade do tráfico, por iso dende o Concello de Vilalba impulsamos este tipo de traballos tanto no ámbito urbano como rural, dando resposta ademais ás demandas veciñais”, afirma Luis Fernández, concelleiro de Infraestruturas de Vilalba. 

8 de abril de 2021

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies