Visita dos Reis Magos a Vilalba, casco urbano e parroquias

OS REIS MAGOS VISITARÁN MAÑÁ TODAS AS PARROQUIAS E O CASCO URBANO DE VILALBA PARA SAUDAR AOS NENOS E NENAS GARDANDO A DISTANCIA DE SEGURIDADE

Vilalba, 4 de xaneiro de 2021. O Concello de Vilalba informa que os Reis Magos visitarán maña, 5 de xaneiro, once parroquias e o casco urbano de Vilalba.
 
Neste Nadal tan distinto, o goberno local de Vilalba programou os eventos destas datas adaptándose á situación sanitaria. Así, por primeira vez, os Reis Magos visitarán as parroquias do municipio, co obxectivo de que todos os cativos e cativas poidan saudar ás súas Maxestades. 
 
As súas maxestades iniciarán o percorrido polas parroquias ás 12:00 horas, con 11 paradas en total. Concretamente, visitarán as Casas Escola das seguintes parroquias: Árbol, Torre e San Simón ás 12:00; Román, Tardade e Lanzós ás 15:00; Goiriz, Santaballa e Nete ás 16:30; e Samarugo, Oleiros ás 18:00 horas.
 
Doutra banda, tras esta xornada de visita ás parroquias, as rúas do casco urbano de Vilalba recibirán aos Reis Magos a partir das 18:00 horas. Sairán dos Freires e percorrerán a meirande parte das rúas da vila, indicadas no cartel do evento.  
 
Dende o Concello de Vilalba recórdase que non haberá recepción por parte dos Reis Magos nin entrega de agasallos, dado o contexto sanitario actual. Porén, os nenos e nenas de Vilalba poderán saudar ás súas maxestades na súa visita ao casco urbano e ao rural, sempre dende a súa casa ou portal, e de non ser posible, achegándose ao punto máis próximo. 
 
A planificación da visita dos Reis Magos a Vilalba ten como obxectivo evitar as aglomeracións polo que, dende o goberno local, pídese á veciñanza o cumprimento das normas de distanciamento interpersoal, para que os cativos e cativas poidan gozar desta celebración.
 
Por último, faise fincapé de novo en que os Reis Magos tan só saudarán no seu paseo, xa que o contexto sanitario impide a celebración dunha recepción ou dunha entrega de agasallos. 

OS REIS MAGOS VISITARÁN MAÑÁ TODAS AS PARROQUIAS E O CASCO URBANO DE VILALBA PARA SAUDAR AOS NENOS E NENAS GARDANDO A DISTANCIA DE SEGURIDADE

4 de enero de 2021

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies