A alcaldesa, Marta Rouco, agradeceu a colaboración da empresa e animou á veciñanza a participar nunha xornada pensada para gozar en familia.
A alcaldesa de Vilalba, Marta Rouco, e o director de Personas e Comunicación de Grupo Entrepinares, Roberto Cabezas, presentaron hoxe a programación de Samaín 2025 do Concello de Vilalba, patrocinada por Grupo Entrepinares.
O vindeiro sábado, 1 de novembro, Vilalba celebrará o Samaín cunha completa programación pensada para todos os públicos e que se desenvolverá a partir das 16:00 horas na Praza da Constitución, con túnel do terror, inchables e magosto.
Un dos pratos fortes da xornada será o tradicional concurso de cabazas, que volverá contar con dúas categorías: infantil (menores de 12 anos) e familiar (mínimo un menor de 12 anos).
A entrega de cabazas poderá realizarse entre as 11:00 e as 13:00 horas na Praza da Constitución, onde pola tarde estarán expostas para que o público poida admirar as creacións participantes.
A entrega de premios celebrarase ás 19:00 horas, e os galardóns serán os seguintes: na categoría infantil, o 1º premio constará dunha bicicleta e diploma e o 2º e 3º premio, un agasallo e diploma; na categoría familiar: o 1º premio, consistirá nunha cámara instantánea e diploma e o 2º e 3º premio, un agasallo e diploma.
Durante a presentación, a alcaldesa Marta Rouco agradeceu a colaboración de Grupo Entrepinares, “unha empresa comprometida coa nosa vila e coa dinamización social e cultural de Vilalba”. Engadiu que “gracias a esta colaboración podemos seguir ofrecendo actividades para todas as idades; días de encontro, diversión e participación para os veciños e veciñas”.
Rouco tamén animou á cidadanía a participar e botar a voar a súa imaxinación: “O Samaín é unha das festas máis creativas e familiares do ano, e queremos ver a Praza da Constitución chea de cor, de risas e das cabazas máis orixinais”.
Pola súa banda, o director de Personas e Comunicación de Grupo Entrepinares, Roberto Cabezas, salientou que “en Grupo Entrepinares estamos muy orgullosos de colaborar un año más con el Ayuntamiento de Vilalba en la celebración del Samaín 2025. Para nosotros supone una cita que une tradición, creatividad y comunidad. Nos encanta poder formar parte de iniciativas que dan vida a las calles y fomentan la participación de grandes y pequeños en torno a la cultura local.”
Esta programación enmárcase no acordo de colaboración entre o Concello de Vilalba e Grupo Entrepinares, que permite desenvolver ao longo do ano diversas actividades lúdicas e recreativas dirixidas á infancia e ás familias na capital chairega.
Desde o Concello de Vilalba subliñan que o Samaín é unha das citas máis esperadas do outono, “un exemplo máis do compromiso da Alcaldía por gobernar para todos e todas, impulsando propostas que fomentan a convivencia, a participación e o orgullo de vila”.
