ELBA VELEIRO RECIBE UN RECOÑECEMENTO POLA SÚA COLABORACIÓN CO MOVEMENTO VECIÑAL

Máis de 1.500 persoas de toda a provincia reuníronse esta tarde no Pazo de Feiras e Congresos de Lugo para celebrar o Día do Veciño, unha iniciativa da Federación Provincial de Asociacións de Veciños da provincia de Lugo ‘Lucus Augusti’.

‘A forza da veciñanza’ e ‘Lugo, esencia rural’ foron os dous lemas da xornada, na que a federación fixo entrega dos seus premios ‘V de Veciño/a exemplar’ a todas aquelas persoas e colectivos que se caracterizan pola súa colaboración co movemento veciñal.

Unha das galardoadas foi a alcaldesa de Vilalba, Elba Veleiro, que acudiu ao acto con Marta Rouco, concelleira de Políticas Sociais, Economía e Facenda, Duarte Barrio e o seu fillo Miguel.

“Unha satisfacción é un orgullo para min, como alcaldesa de Vilalba, recoller este premio das asociacións de veciños, que configuran un tecido vital na vida diaria dos concellos e dos seus barrios”, asegura Elba Veleiro.

“As persoas que actúan e traballan de forma anónima na súa comunidade máis próxima son fundamentais na nosa sociedade; aínda vivimos en tempos de pandemia e cando no futuro repasemos o que supuxo lembraremos con orgullo a solidariedade dos nosos veciños e veciñas”, apuntou a alcaldesa.

“Durante as semanas máis duras do confinamento, en ocasións de forma individual pero moitas veces a través das asociacións, moitos veciños e veciñas estiveron sempre en disposición de axudar aos nosos maiores, aos colectivos de máis risco que necesitaban comida ou mediciñas pero non podían arriscar a súa saúde saíndo da casa”, lembrou Veleiro.

“Ademais deste factor humano, as asociacións veciñais desenvolven tamén un papel importante na demanda de mellores servizos para os seus barrios, xa que son testemuñas directas das necesidades que xorden no seu entorno”, engadiu.

“Quero ter unha mensaxe de felicitación para o resto das persoas homenaxeadas e reiterar o meu compromiso e a de todo o grupo de goberno de Vilalba coas asociacións de veciños, polo seu traballo para mellorar a vida da xente”, rematou Veleiro.

23 de Outubro de 2021

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies