O CONCELLO CONVOCA O CONCURSO DE DEBUXO INFANTIL PARA DESEÑAR O CARTEL DA FEIRA DO CAPÓN 2022

Este certame busca facer partícipes aos nenos e nenas na creación dun debuxo que formará parte do cartel oficial da Feira do Capón de Vilalba do ano 2022

O Concello de Vilalba, a través da súa Concellería de Educación, Infancia e Mocidade, Feiras e Mercados, presenta o concurso de debuxo infantil “Cartel Feira do Capón 2022”. Este certame busca facer partícipes aos nenos e nenas na creación dun debuxo que formará parte do cartel oficial da Feira do Capón de Vilalba do ano 2022.

“Queremos que os cativos e cativas se sintan incluídos nunha das citas máis importantes de Vilalba, como é a Feira do Capón. Este concurso permítenos que os pequenos e pequenas desenvolvan a súa creatividade á vez que aprenden sobre este evento e a súa transcendencia no municipio”, subliña Antía Rama, concelleira de Educación, Infancia e Mocidade, Feiras e Mercados de Vilalba.

Poderán participar no concurso os nenos e nenas ata os 12 anos de idade. Os traballos presentados estarán en relación ao Capón, á súa cría, a feira ou outros temas relacionados. Unicamente se admitirá un debuxo por neno/a que se presentará empregando calquera técnica artística (agás purpurina e tintas metálicas), nunha cartolina tamaño DIN A-4.

O xurado valorará a orixinalidade e a calidade do debuxo, tendo presente a idade do seu autor ou autora. O debuxo que resulte gañador será premiado cunha tablet e será a imaxe do cartel da Feira do Capón do ano 2022.

Os participantes poden inscribirse ata o próximo xoves 9 de decembro de 2021, a través da sede electrónica do Concello de Vilalba (https://vilalba.sedelectronica.es/) ou presencialmente no rexistro, de 9:00 a 14:00, cubrindo a folla de inscrición dispoñible na web do concello (https://www.vilalba.gal/) e na oficina de cultura.

Achéganse as bases do concurso e a solicitude de participación, que inclúen máis información sobre este evento.

23 de Novembro de 2021

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies