O CONCELLO PRESENTA AOS VECIÑOS A RENOVACIÓN DO VIAL QUE COMUNICA SAMARUGO E CORVELLE

O concelleiro de Infraestruturas do Concello de Vilalba, Luis Fernández, presentoulle esta mañá aos veciños o proxecto de rexeneración integral do vial municipal que comunica as parroquias de Samarugo e Corvelle.

En concreto, Fernández estivo co pedáneo de Corvelle, José Grandío González, e o de Samarugo, José Ángel Río Vázquez, para explicarlles a actuación na estrada de titularidade municipal que comunica a zona sur da parroquia de Samarugo coa estrada provincial LU-P-6505, en Corvelle.

O tramo ten un percorrido lonxitudinal de 3.155 metros e un ancho medio de 3,80 metros. A actuación inclúe ademais darlle unha solución aos problemas de drenaxe existentes en dous puntos de vias municipais de Corvelle.

O paso do tempo, a acción da auga e o intenso uso do vial que comunica as dúas parroquias provocaron o seu deterioro, polo cal resulta urxente a actuación, xa que a falta de capas superficiais de pavimento dificulta o tráfico de vehículos e peóns, incrementando o risco de caídas ou accidentes.

Por isto, a solución proposta para esta vía consiste na limpeza de noiros, a regularización da súa base e a pavimentación de toda a superficie con doble tratamento.

“É unha estrada moi transitada que necesita unha renovación de forma urxente, mellorando a seguridade viaria e dando resposta ás demandas dos veciños e veciñas de ambas parroquias”, explica o concelleiro de Infraestruturas.

Os traballos sairán a licitación a curto prazo e terán un orzamento próximo aos 57.000 euros. Forman parte do Plan Único da Deputación de Lugo e, unha vez adxudicadas as obras, a empresa adxudicataria completará a renovación do vial e solucionará os problemas de drenaxe no prazo dun mes.

29 de abril de 2021

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies