O Vicealcalde e Responsable de Mobilidade do Concello de Vilalba, Modesto Renda, informou hoxe da formalización dun contrato coa consultora especializada iPlan para a realización dun estudo de tráfico previo á reorganización do sentido circulatorio da Rúa da Pravia.
O obxectivo é facilitar a entrada tanto de visitantes coma de veciños/as do rural ao centro urbano e favorecer, así, o interese comercial dunha vila que en palabras do propio Renda “sempre foi unha vila servizos proxectada cara ás parroquias”.
“Actualmente a Rúa da Pravia conta con varias paralelas que comparten con ela o mesmo sentido circulatorio e os núcleos rurais máis poboados do Concello atópanse cun máis difícil acceso”, explicou. Seguindo esta lóxica, o cambio da dirección facilitaría a entrada ao groso da poboación rural, principal consumidora do comercio e a hostalería de Vilalba.
Ademais, e na liña de primar o interese comercial ao tempo que se mellora a mobilidade, o Vicealcalde lembrou tamén que a outra grande parte dos consumidores do comercio e a hostalería local son veciños/as de Concellos limítrofes como Xermade, As Pontes ou Ferrol e que entran a Vilalba pola A8 e a AG64. A actual dirección na Rúa da Pravia contravén o que sempre foi un acceso natural e neste senso tamén se pronunciará o estudo.
Por último, Renda non quixo deixar pasar o feito de que a actual dirección da Rúa da Pravia é contraria, así mesmo, á entrada natural á vila do Camiño de Santiago (Camiño Norte) e é aí onde a empresa tamén deberá arroxar solucións pois, no marco de esixencias do Concello, Renda definiu como prioritario a mellora das conexións de tráfico e peonís dende a propia Rúa da Pravia ata o Casco Histórico.
METODOLOXÍA, ÁMBITO DE ACTUACIÓN E PRAZOS DO ESTUDO
Desde o punto de vista do traballo en gabinete coexistirán dúas propostas metodolóxicas, aínda que, para ambas hai unha parte que é común, isto é: a caracterización da contorna urbana; a caracterización da demanda (análise da mobilidade no ámbito); a caracterización do tráfico na área de estudo para a obtención de datos adicionais e a campaña de aforos (tipoloxía, duración, tipos de datos recolleitos, clasificación de vehículos, etc.)
Deste xeito establecerase unha xustificación das horas punta seleccionadas e cos resultados dos aforos determinaranse os principais patróns de mobilidade no ámbito, principalmente a distribución horaria do tráfico e selección das horas punta máis desfavorables (horas de acceso e/o saída).
O estudo, avaliará e contraporá dous escenarios, sendo o escenario nº1 o relativo á situación actual e nº2 o referido á situación futura con cambio de sentido.
A análise dos niveis de servizo (modelización de VISUM) dará como resultado adicional una matriz de mobilidade que representa os movementos no ámbito para o período considerado e dita matriz será utilizada para levar a cabo a microsimulación do ámbito de estudo nos períodos que se consideren máis desfavorables, tanto no escenario actual como futuro coas actuacións propostas, co obxecto de analizar o seu funcionamento e propór, no seu caso, posibles melloras.
Así, e tal e como explicou Renda, en caso de identificarse algún problema, elaboraranse unha serie de propostas que permitan mellorar o funcionamento xeral do tráfico no ámbito preestablecido (melloras en interseccións; ordenación de sentidos e movementos noutras rúas; reordenación de seccións ou a eliminación de liñas de aparcamento).
Para completar o modelo de tráfico de situación actual será necesario a realización de traballos de campo, concretamente a medición de aforos ao longo do ámbito de estudo. A campaña de aforos realizarase durante un día laborable. Neste caso, propóñense os seguintes puntos de aforo orientadores, co obxectivo de poder calibrar a rede en situación actual.
A campaña de aforos realizarase mediante aforos automáticos gravando un período de 16 horas (de 6:00 a 22:00 horas) os dous días. Co obxectivo de optimizar custos analizarase durante 16 horas o tronco da Rúa dá Pravia e o resto dos puntos, 4 horas (horas punta).
1) Rúa dá Pravia – Rúa Conde Pallares – Rúa de Galicia (Glorieta): 16 horas de medición e 4 de análise por día.
2) Rúa dá Pravia – Rúa Plácido Peña – Cale Campo de Puente (Intersección): 16 horas de medición e 4 de análise por día.
3) Rúa dá Pravia (Tronco): 16 horas de medición e 16 de análise por día.
4) Avenida dá Terra Chá – Avenida de Cospeito (Intersección): 16 horas de medición e 4 de análise por día.
5) Rúa Campo de Puente – Avenida de Cospeito (Intersección): 16 horas de medición e 4 de análise por día.
6) Rúa de Galicia – Rúa José María Chao Ledo (Intersección): 16 horas de medición e 4 de análise por día.
7) Rúa Plácido Peña – Rúa as Pontes – Rúa Cidade de Viveiro (Intersección): 16 horas de medición e 4 de análise por día.
Para a realización de aforos en interseccións, troncais e glorietas, utilizarase un sistema de aforo automáticos mediante captura de VÍDEO PORTATIL (Unidade Recolectora de vídeo SCOUT) que permite a realización de aforos no viario, realizando unha recolección automática. Distinguirase entre vehículos lixeiros e pesados.
Unha vez gravadas as imaxes das distintas vías e interseccións, os datos son tratadas por un software de análise de imaxes, que permite clasificar e contar os vehículos que realizan os diferentes movementos que se permiten en cada intersección.
Os traballos de campo mediante cámaras iniciaranse cando a empresa solicite a autorización do Concello de Vilalba e o prazo do Estudo será de 4 semanas tras a recepción dos traballos de campo.
OUTROS TRABALLOS REALIZADOS POLA EMPRESA CONTRATADA
Concello de Vilalba
Plaza da Constitucion 1
27800 Vilalba – Lugo
Oficinas Xerais tlf. 982 510 305
