O Concello de Vilaba anuncia que o próximo mural que se colocará no municipio estará dedicado ao escritor vilalbés Agustín Fernández Paz. De momento, o goberno local está a buscar ubicacións para esta obra, que será realizada polo artista ourensán Mon Devane.
Este novo mural súmase aos tres que xa embelecen o casco urbano de Vilalba, na rúa Carmiña Prieto Rouco, de Pablo Lage (Van-Kraft); na rúa do Cotarón, de Miguel Peralta (Cestola na Cachola); e na travesía dos Castros, de Lula Goce.
“Dende o goberno local impulsamos estes murais para contribuír á humanización do municipio, apostando pola arte urbana e ademais, neste novo mural, enxalzando a figura dun dos escritores de referencia das nosas letras”, subliña Luis Fernández, concelleiro de Infraestruturas de Vilalba.
O traballo artístico de Mon Devane baséase na utilización do spray como principal ferramenta. O seu percorrido inclúe un gran número de eventos e festivais de arte urbana en todo o mundo.
O escritor vilalbés, Agustín Fernández Paz, é unha das referencias da literatura galega, sobre todo, das obras para público infantil e xuvenil. Dende o goberno local apóstase por preservar o seu legado apoiando iniciativas como o premio Agustín Fernández Paz de narrativa infantil e xuvenil, impulsado polo IESCHA e Edicións Xerais, á que agora se suma este mural.
Ademais, o goberno local están a traballar sobre distintas iniciativas e propostas arredor da figura de Fernández Paz, que irán anunciando nos próximos meses.
Concello de Vilalba
Plaza da Constitucion 1
27800 Vilalba – Lugo
Oficinas Xerais tlf. 982 510 305
