O CONCELLO SOLICITARÁ UNHA SUBVENCIÓN DE 25.000 EUROS Á XUNTA PARA CORRIXIR O IMPACTO DA FACHADA DUN EDIFICIO MUNICIPAL

No caso de non obter a axuda autonónica, acometerá a actuación con fondos municipais

O Concello de Vilalba vai solicitar á Xunta de Galicia unha subvención para corrixir o impacto na contorna urbana da fachada do edificio municipal onde se presta actualmente o servizo de Atención Temperá.

En concreto, pedirá 25.000 euros nunha convocatoria de axudas para renovar fachadas “que supoñan un impacto paisaxístico como consecuencia da inexistencia dun adecuado acabado final, o deficiente estado de conservación ou a tonalidade e intensidade da actual cor de acabado”.

“Lamentablemente, a Xunta convoca de novo unhas axudas que se conceden por orde de chegada das solicitudes, cando deberían priorizar e ter en conta o impacto real das fachadas para a concesión obxectiva deste tipo de subvencións; outro procedemento autonómico máis por concorrencia non competitiva”, asegura Luis Fernández, concelleiro de Infraestruturas de Vilalba.

O Concello de Vilalba informa aos seus veciños e veciñas de que, no caso de non obter a axuda autonónica, acometerá a actuación con fondos municipais.

“Traballamos desde o comezo deste mandato municipal para humanizar o casco urbano de Vilalba, polo que consideramos que este edificio necesita un cambio de imaxe”, engade Fernández.