Preto de 100 microrrelatos presentados ao Certame do Concello de Vilalba e Culturalia GZ

A convocatoria desta segunda edición tivo unha excelente acollida segundo a valoración das dúas entidades
O fallo do xurado emitirase o vindeiro 19 de xuño, e a composición do mesmo darase a coñecer na mesma data
“A alta participación deixa patente que a xente goza destes certames nun formato reducido que chega a máis persoas”
 
Vilalba, 14 de maio de 2020
 
A área de Cultura do Concello de Vilalba e Culturalia GZ, entidades convocantes do Certame de Microrrelatos Día do Libro, veñen de anunciar a participación de preto de 100 persoas nesta segunda convocatoria, valorando moi positivamente a implicación da xente ante este formato de escritura “cheo de posibilidades e cun gran atractivo literario”.
O certame lanzado o pasado mes de abril contou cunha ampliación do prazo de entrega de traballos froito da crise sanitaria da COVID-19 que obrigou a ficar na casa ao longo de case dous meses. Esta circunstancia provocou que se adiara o prazo, “decisión que consideramos acertada debido á grande participación, especialmente na categoría de persoas adultas”.
Neste senso, a data na que se emitirá o fallo do xurado pasará ao 19 de xuño, día no que tamén se dará a coñecer a composición do mesmo, con tres membros vencellados ao eido da cultura e da educación.
Repartiranse premios para as gañadoras e gañadores das tres categorías (infantil, xuvenil e adultos) nun acto pendente de confirmación, segundo evolucione a situación na que nos atopamos.
“Nesta convocatoria estamos satisfeitos coa boa acollida”, subliñan, poñendo de relevo que “o microrrelato é un formato que anima moito á participación e amosa o gusto da xente por escribir e fomentar a literatura, aínda máis en momentos coma este”.